နောက်ခံသမိုင်းအကျဉ်း

ပြည်ထောင်စုသမ္မတမြန်မာနိုင်ငံတော်အား ခေတ်မီဖွံ့ဖြိုးတိုးတက်သော စက်မှုနိုင်ငံတစ်ခုတည်ဆောက်ရေးတွင် အဓိကအရေးပါသော သုတေသနလုပ်ငန်းများဆောင်ရွက်ရာ၌ လိုအပ်လျက်ရှိသော နည်းပညာကဏ္ဍအား စနစ်တကျအရှိန်အဟုန်မြင့်စွာ ဖွံ့ဖြိုးတိုးတက်လာနိုင်စေရန်၊ သက်ဆိုင်ရာအခန်းကဏ္ဍအလိုက် ပူးပေါင်းဆက်သွယ်ပါဝင်ဆောင်ရွက်နိုင်ရန်နှင့် နိုင်ငံတော်၏ လူမှုအကျိုးစီးပွားဖွံ့ဖြိုးတိုးတက်မှုဖြစ်စဉ်တွင် နည်းပညာရပ်များ ဖွံ့ဖြိုးတိုးတက်မှုနှင့် စနစ်တကျအသုံးချနိုင်မှုသည် အရေးပါသည့်အခန်းကဏ္ဍမှ ပါဝင်လျက်ရှိပါသောကြောင့် နည်းပညာရပ်ဆိုင်ရာမြှင့်တင်ရေးနှင့် ပူးပေါင်းဆောင်ရွက်ရေးလုပ်ငန်းများ စနစ်တကျအကောင်အထည်ဖော် ဆက်သွယ်ဆောင်ရွက်သွားနိုင်ရန်အတွက် စက်မှုနည်းပညာမြှင့်တင်ရေးနှင့် ပူးပေါင်းဆောင်ရွက်ရေးဦးစီးဌာနအား ၁၉၉၈ ခုနှစ်၊ ဇူလိုင်လ (၂၉) ရက်နေ့ ရက်စွဲပါ အစိုးရအဖွဲ့ အမိန့်ကြော်ငြာစာအမှတ် (၂၆/၉၈)ဖြင့် ဖွဲ့စည်းဆောင်ရွက်ခဲ့ပါသည်။အရည်အသွေးမြင့်မားသော သုတေသနလုပ်ငန်းများနှင့် အရည်အချင်းပြည့်ဝသော IT ကျွမ်းကျင်ပညာရှင်များမွေးထုတ်ပြီး လူ့စွမ်းအားအရင်းမြစ်ဖွံ့ဖြိုးတိုးတက်မှုကို အထောက်အကူပြုနိုင်ရန်အတွက် ၂၀၁၅ခုနှစ်၊ ဧပြီလ(၁)ရက်၌ ပြန်လည်ပြင်ဆင်ဖွဲ့စည်းခဲ့ပါသည်။